Mehnga / Sasta loan

Headline 31.01.08
Mehnga loan dena manzur ghar lene walo ko.
Postmortem :
Mehnga sasta to tab dekho jab wapis karna ho,
Agar wapis na karna ho to mehnga bhi chalta hai.

Raat me safai ya safaya

Headline 31.01.08
Market ki safai raat me.
Postmortem :
Raat me safai ke badle safaya ne ho jaye
zara is baat ka khyal rakhna.

Dusri shadi ka vichar

Headline 31.01.08
kya Jiwam bima policy ka namankan badal sakta hu ?
Postmortem :
Kyun bhai, dusri shadi ka vichar hai kya ?

Short cut ka funda

Headline 31.01.08
Himat hi hai safalta ka short cut.
Postmortem :
Sahi farmaya apne, short cut apnane
ke liye bhi kafi himat chahiye.

Chunav ka kharch

Headline 31.01.08
Parshad payenge ek crore ka vikas fund.
Postmortem :
Arey bhaiya pichley chunav ka kharch to yeh
nikaal chukey aur agley chunav ka kharch apne
thama diya, aur kya chahiya ?
(Published on 01.02.08)

Netao ki chaye...

Headline 31.01.08
Netao ki chaye...
Postmortem :
Aap to sirf hame neta bana do
chaye-pani ka intzaam hum khud kar lenge.
(Published on 01.02.08)

Baap bhayo kotwal...

Headline 31.01.08
S.I. Ka beta giraftar.
Postmortem :
Kya soch ke maar peet ki thi beta
baap bhayo kotwal to dar kahe ka...

Acha waqt anmol

Headline 30.01.08
31 Lakh ki ghadi ke sath giraftar.
Postmortem :
Ghadi mehngi rakhne se waqt
acha thode hi ho jata hai.
(Published on 31.01.08)

Kam dabav me pani

Headline 30.01.08
Kam dabav me ayega pani.
Postmortem :
Daru ki supply to puri hai
phir kahe ka gum hai jaani.
(Published on 31.01.08)

Abla teri yahi kahani

Headline 30.01.08
Balatkari ko mafi, pidita ko banwas.
Postmortem :
Hai ri abla teri yahi kahani,
anchal me hai dudh, ankho me pani.

Nahi sasta hoga loan

Headlin 30.01.08
Nahi sasta hoga loan.
Postmortem :
Agar wapis na karna ho to
mehnga bhi chalta hai.

Loan lene walo ka dil toota

Headline 30.01.08
Loan lene walo ka dil toota.
Postmortem :
Ek ka to toot na hi tha, inka nahi
toot ta to baad me dene walo ka toot ta.

Jahan maal hi maal hai

Headline 29.01.08
Kai police adhikari idhar se udhar.
Postmortem :
Kahan jate hai, kiska khyal hai
thana vahi lena jahan maal hi maal hai.
(Published on 30.01.08)

Bunty aur Babli

Headline 29.01.08
12 Smarak ho gaye gayab.
Postmortem :
Arey bhai pata karo kahin bunty aur babli
to nahi aa gaye shehar me.
(Published on 30.01.08)

Sania ka nahi sani

Headline 29.01.08
Sania hui asia no. one.
Postmortem :
Sania tera nahi koi sani
jiske sung tu khele
vo mange nahi pani,
(Published on 30.01.08)

Sarkar aur nigam

Headline 29.01.08
Stamp duty par sarkar aur nigam amne-samne.
Postmortem :
Aur rafree ka kaam karenge Telgi saheb.
(Published on 30.01.08)

Adhikario ke tabadale

Headline 29.01.08
Delhi sarkar ke adhikario ke tabadale.
Postmortem :
Ek jagah rehna bhi nahi chahiye,
kya pata kab logo ka gussa phoot padhe.

Kal ki kal dekhenge

Headline 28.01.08
Pura ration dene ki yojna.
Postmortem :
Is tarah ki yojnao se aaj to wah-wahi
loot lo, kal ki kal dekhenge.
(Published on 29.01.08)

Nithalo ka raaj

Headline 28.01.08
Kiraye par sarkari geraj,
vahan nithalo ka raaj.
Postmortem :
Desh bhakto ne apni jaan gava ke azadi dila di
aaj ke netao ne iski mati palid kara di.

Janam sidh adhikar

Headline 28.01.08
Chunav purv prachar tantra se ched-chad.
Postmortem :
Aur chunav pashchat natijo se ched-chad
maantey hai isko apna janam sidh adhikar.
(Published on 29.01.08)

Made in India

Headline 28.01.08
Cheen ka maal nahi, made in India chahiye.
Postmortem :
Kamaal hai pehle batana tha na
made in India ki stamp banwane
me der hi kitni lagti hai.
(Published on 29.01.08)

Kidney ka vigyan

Headline 28.01.08
Kidney pratyaropan ka vigyan.
Postmortem :
Vigyan ka to pata nahi
lekin hisab ka zaroor pata hai
1 me ati hai aur 10 me jati hai.
(Published on 29.01.08)

Plato par malikana haq

Headline 28.01.08
Plato par milega malikana haq.
Postmortem :
Kiske plato par ? apne ya padisio ke
aur kise milega haq ? janta ko ya netao ko...

Uplabdhion ki fehrist

Headline 27.01.08
Uplabdhion ki taza fehrist.
Postmortem :
Nithari ke bacho ke baad,
gurgaon ka kidney racket,
yeh kal 26 jan. ko hi padha tha.

Dry day par pani nahi

Headline 27.01.08
Gantantra divas par bhi pani ki killat.
Postmortem :
Arey kuch to reham karey sarkar
aaj pani de ya dry day hataye.
(Published on 28.01.08)

Khokhley daavey

Headline 27.01.08
Rajnayiko ki suraksha badhi.
Postmortem :
Inke kehne par yakeen mat karna
Benazir ke liye bhi yeh aise hi kehte they.

Bharat desh hamara

Headline 27.01.08
Sardi sihrayegi, barish kehar dhayegi.
Postmortem :
Sarkar jo bhi ayegi
bati gul kar jayegi
karenge lakdi-koyla sek guzara
yeh hai Bharat desh hamara.

Desh ki aan-baan-shaan

Headline 27.01.08
Rajpath par dikhi desh ki aan-baan-shaan.
Postmortem :
Aur Gurgaon me dikha kuch doctors
ki doctori ka kamaal.

Chor ya sadh

Headline 27.01.08
Huda aur police ne mani galati.
Postmortem :
Pakde gaye to chor nahi to sadh.
(Published on 28.01.08)

Police ki bhumika

Headline 26.01.08
Badal gai police ki bhumika.
Postmortem :
Sahi farmaya apne, jo kaam pehle
50 rupay me ho jata tha, ab 500
me bhi nakhrey dikhatey hai.
(Published on 27.01.08)

Mera No.kab ayega ?

Headline 26.01.08
Aur is baar ke padam puruskar...
Postmortem :
Bahut hi behas ke baad chuney gaye
yeh log, jo nahi chuney gaye vo
kripya agli dafa koshish kare.
(Published on 27.01.08)

Haryana ka dhud-ghee

Headline 26.01.08
Haryana se pani nahi mila.
Postmortem :
Aap bhi galat darwaza khatkhata
rahe hai, haryana se pani nahi,
dudh aur ghee maangte to mil bhi jata.

Bharat ki halat

Headline 26.01.08
Bapu ki bahu laxmi,
jab Delhi par sharminda thi.
Postmortem :
Aaj agar bapu hote to shayad
sare Bharat par hi sharminda hote.

Purani adtey

Headline 26.01.08
Bager donation bacho ko pravesh nahi.
Postmortem :
Inka dosh nahi hai, purani adtey hai
jatey-jatey hi to jayengi.

Kissa bunty-babli ka

Headline 25.01.08
Bech dala pokharan firing renj.
Postmortem :
Bhai yeh kamaal to bunty aur babli
hi kar sakte hai, mujhe to tajmahal,
lalkila aur kutub minar ki chinta hone lagi.

Comandos ki comand

Headline 25.01.08
Rajpath comando ke havale.
Postmortem :
Vaise to waqt ki maang bhi yahi hai ki
sare desh ko hi comandos ke havale kar diya jaye

Giravat ki vajah fraud

Headline 25.01.08
Giravat ki vajah fraud to nahi.
Postmortem :
Ab giravat ki vajah se fraud ho
ya fraud ki vajah se giravat ho
jhelna to aam admi ko hi padhta hai.

Filmo ka asar

Headline 25.01.08
Apharan film dekh kar kiya apharan.
Postmortem :
Arey bhai nishabd aur chini kam
to mene bhi dekhi thi, mujhe kya karn chahiye.

TV vs Mobile

Headline 24.01.08
Ab mobile pe milega TV dekhne ka maza.
Postmortem :
Koi aisa jugar nahi jo TV se mobile ka maza mil sake
(Published on 25.01.08)

Executive ki udhan

Headline 24.01.08
Purse udhane lagi air line ki executive.
Postmortem :
Matlab to udhane se hai,
jahaz nahi to purse hi sahi.

Khel khel me

Headline 24.01.08
Khel sanwarenge pul-galiyare.
Postmortem :
Is sanwarney ke khel me hi kai
khel khele jayenge.

Maanyta ki maanyta

Headline 24.01.08
Maanyta ko mili maanyta.
Postmortem :
Kab tak rahegi maanyta ki maanyta
yeh koi nahi jaanta.

Neta ji ke rastey

Headline 24.01.08
Neta ji ko kai roopo me yaad kiya.
Postmortem :
Jis din unke bataye rasto par chaloge
us din batana.

Sarkar ek jua

Headline 24.01.08
Jua ghar chala rahi sarkar : A.B.Bardhan
Postmortem :
Sarkar to khud ek jua hai,
kab pasa palat jaye, kaun jaanta hai ?
(Published on 25.01.08)

Blueline ka asar.

Headline 23.01.08
DTC ne bazurg ko kuchla.
Postmortem :
Arey bhai blue lin walo ki chaal to mat chalo

Zamane ke sang

Headline 23.01.08
Baap ko bete ki nasihat.
Postmortem :
Zamane ke hi chalo hazoor, bacho ki
manenge to sukhi rahenge.

Rassi jal gai bal nahi gya

Headline 23.01.08
Ab bhi no. ek Austreliya : Le
Postmortem :
Rassi jal gai magar bal nahi gya.

Ram bhali karenge.

Headline 23.01.08
Ghodi chadne wala hai vilasrao ka beta.
Postmortem :
Chadh ja beta ghodi pe ram bhali karenge.

Krishi ya hatiyar pradhan

Headline 23.01.08
Rampur me ab revolver ki fasal
Postmortem :
Krishi pradhan se ab hatiyar pradhan
hone ka irada hai kya ?
(Published on 24.01.08)

Bhartiye neta

Headline 22.01.08
Bhartiye neta bethe bhook hadtaal par
Postmortem :
Yeh Bhartiye neta hai bhaiya.
zara dhyan se dekhna kahin
idhar udhar potli na chupa di ho.

Choti car

Headline 22.01.08
Maruti chhoti car utaregi.
Postmortem :
Aur kitni choti car layoge bhai.
admi usme beth ke hi chalayega
ya remote se ?

Mobile me tehalka

Headline 22.01.08
Bina charge kiya chalega mobile.
Postmortem :
Lekin hame to vo mobile chahiye
jo bina re-charge ke bhi chalta rahe.
(Published on 23.01.08)

India di hope

Headline 22.01.08
Adilad me bhi jeet sakte hai : Bhaji
Postmortem :
O papa ji tusi taup ho
India di hope ho.
(Published on 25.01.08)

Gusse ka prakop

Headline 22.01.08
Saansad ne inspector ko pita.
Postmortem :
Bhai saansad ne to bivi ka gussa
inspector par utar diya aur
inspector ka gussa utrega bechari
janta par.

Kambhakt ishq

Headline 21.01.08
Sarkoji ki lokpriyata me giravat.
Postmortem :
Kambhakt ishq na nikkama kar diya
verna admi to yey they kaam ke.

Apni marzi ke maalik

Headline 21.01.08
Jai ram bina ijazat chale gaye pak.
Postmortem :
Dekhna bhaiya kahin aisa na ho ki vo
gaye to apni marzi se, lekin ana padhe unki marzi se.

Mohabat ka chashma

Headline 21.01.08
Francici ghatia, paris pradushit
par sarkoji nepolian.
Postmortem :
Yeh to kamaal hai mohabat ke chashme ka
madam, jis din utrega us din puchenge.

Dulhan hi dahej hai

Headline 21.01.08
Maanga dahej, dulhan ne lautai barat.
Postmortem :
Dulhan hi dahej hai, yeh suna nahi tha kya ?

Naam karan

Headline 21.01.08
England me naam badalne ka chaln.
Postmortem :
Kash naam badalne se soch bhi badal sakti !

Mausam ka u turn

Headline 20.01.08
Mausam ka u turn, para ludka.
Postmortem :
Arey yaar acha bhala nahane ja rahe they,
yeh khabar padh ke hamne bhi u turn le liya.

Der aye durust aye

Headline 20.01.08
Delhi ko 15 varsho ke baad ranji khitab.
Postmortem :
Ise kehte hai ' Der aye durust aye '

Raja babu ki khatia

Headline 20.01.08
Rajniti nahi, filmo par zyada dhyan hai govinda ka.
Postmortem :
Raja babu to bas filmo me hi khatia sarka sakte hai
bhaiya, rajniti me to yeh khud sarak jayenge.

Salu ko salah

Headline 20.01.08
Chhati dikhana mehnga padha.
Postmortem :
Salu miya maleyshia mat jana,
verna yahan ke fans intzaar hi karte reh jayenge.

Shiksha aur pesha

Headline 20.01.08
Shiksha ko peshe se joda jaye.
Postmortem :
Shiksha ko peshe se jodo ya na jodo,
lekin har peshe se shiksha zarur le sakte hai.

Purani yaadey

Headline 20.01.08
Bruni tajmahal dekhengi magar akele.
Postmortem :
Ho sakta hai kuch purani yaadey taza
karni ho, jo sarkoji ke saamne nahi ho sakti thi.

Achey pat ki nishani

Headline 19.01.08
Mujhe Bill ke pyar par kabhi shaq nahi hua : Hilleri
Postmortem :
Achey pat ki yahi to nishani hoti hai,
vo bahar kuch bhi kare lekin
ghar me bhanak nahi lagne dete.

Hindustan me hindi

Headline 19.01.08
Hindi ko mili saans lene ki jagah.
Postmortem :
Hindustan me hindi ka yeh hal dekh kar
afsos hi nahi hua balike sharam aai...
(Published on 20.01.08)

Premika se shaadi

Headline 19.01.08
Maa chahti hai beta kare premika se shaadi.
Postmortem :
Zara patni ki rai bhi jaan lete hazoor.

lohar ka beta sunar

Headline 19.01.08
Bin laden ka beta ban na chahta hai shanti doot.
Postmortem :
Jab lohar ka beta sunar ban sakta hai to yeh kyun nahi.

Naye tal-mel

Headline 19.01.08
Thok bazaro ko nai jagah le jana kabool nahi.
Postmortem :
Ab nai jagah par naye admio ke sath tal-mel
bithana bhi to asaan nahi.
(Published on 20.01.08)

Samuhik vivah

Headline 18.01.08
Samuhik vivah karyekram 19 ko.
Postmortem :
Jung ke maidan me auro ka sath ho to
honsla badh jata hai.
(Published on 19.01.08)

Khane ke sapne

Headline 18.01.08
Rashtra pati ke sath chaye aur
pradhan mantri ke sath samose khane ke sapne.
Postmortem :
Aur khana khane ke liye Bachan saheb ko sampark kare ?

Pani b-naam soda

Headline 18.01.08
Pani ki apurti prabhavit rahegi.
Postmortem :
Koi baat nahi, aaj ham sode se kaam chala lenge.
(Published on 19.01.08)

Shohar ko khatra

Headline 18.01.08
Zardari ko koi khatra nahi.
Postmortem :
Sahi farmaya janab, bivi ke chale
jane ke baad shohar ko kya khatra ho sakta hai ?

Apno ki sewa

Headline 18.01.08
Paanch paise hi pahunch
rahe hai neeche tak : Rahul
Postmortem :
Zara gaur se dekhiye sir,
neeche bhi koi apna hi betha rakha hoga.
(Published on 19.01.08)

Nakdi ke bajaye vardi

Headline 17.01.08
Nakdi ke bajaye vardi.
Postmortem :
Sahi hai sir, vardi ka intzaam
aap kar do, nakdi ka ham kar lenge.
(Publshed on 18.01.08)

Mile sur mera tumhara

Headline 17.01.08
Minority kote par kendra ke do sur.
Postmortem :
Lagta hai inho ne yeh gana suna nahi
"Mile sur mera tumhara "

Apsi taal-mel

Headline 17.01.08
Comercial v mix land sadko par
karobaar ki anumati.
Postmortem :
Lagta hai vyapario aur
karam chario me taal-mel beth hi gaya.

Beech ke log

Headline 17.01.08
Logo tak nahi pahunch raha yojnayo ka paisa : Rahul
Postmortem :
Beech ke logo ki chatai kar do phir dekho
kaisa paisa khud b khud logo tak pahunchta hai.

Khudai ki kamai

Headline 17.01.08
Paisa jama karane par
hi hogi sadak khodne ki ijazat.
Postmortem :
Kis tarah ka paisa jama karane par,
officialy ya un officialy ?

Schoolo ko asuvidha

Headline 17.01.08
Schoolo me suvidhayo par court ne jawab manga.
Postmortem :
Yakeen janiye apke is swal ka jawab
dene me school walo ko bahut asuvidha hogi.

Sabak ka sabak

Headline 17.01.08
Pakistan le cheen se sabak : Adwani
Postmortem :
Aur hame sabak sekhane wala
to koi paida hi nahi hua.

Blue line ka score

Headline 17.01.08
July tak sadko par daudengi 500 lo floor buse
Postmortem :
Kuch to reham khayo bhai,
july tak to blue line ka score
kahan se kahan pahunch jayega.

Neno ka didar

Headline 16.01.08
Neno ka didar, badha metro ka vyapar.
Postmortem :
Jo neno se karte hai pyar,
vo metro se kaise kare inkar.
(Published on 17.01.08)

Pyar ka anjaam

Headline 16.01.08
Premika ko maar kar jaan di.
Postmortem :
Aaj pata laga ki pyar me
jaan dena aur lene ka kya matlab hota hai.
(Published on 17.01.08)

Driver bekar

Headline 16.01.08
Training schoolo ki maanyta radh,
kafi driver bekar.
Postmortem :
Bilkul bhi dil chota mat karna,
blue line walo se milo, unhe aap logo
ki sakth zarurat hai.
(Published on 17.01.08)

Surakshit ganje

Headline 15.01.08
Zulf ho sakti hai jaan leva.
Postmortem :
Ganje itminaan rakhe, vo bilkul surakshit hai...
(Published on 16.01.08)

Afsaro ki rajniti

Headline 15.01.08
Rajniti se dur rahe afsar : Kiyani
Postmortem :
Aur afsarshahi par jo rajniti hoti hai
us par kya vichar hai janab ?

Online vibhag

Headline 15.01.08
Delhi sarkar ke 23 vibhag online.
Postmortem :
Vibhag bhale hi on line ho jaye
lekin inka kaam to of-line hi rahega.

Blue line ka khata

Headline 15.01.08
Naye saal me blue line ka dusra shikar.
Postmortem :
Akhir khata chalu kar hi diya apne...
(Published on 16.01.08)

Samajhdaar ko ishara

Headline 15.01.08
Dhut yuvak ki kar di nasbandi.
Postmortem :
Beshaq piyo lekin dhut mat hona bhaiya,
samajhdaar ko ishara hi kafi hai...

Desh ka bhavishye

Headline 15.01.08
Shukr hai ham loksabha me nahi hai.
Postmortem :
Aur jinko vote de kar bhaja hai kya
voh is kabil they ? Jawab zara soch ke
dena, desh ke bhavishye ka swaal hai....
(Published on 16.01.08)

Britni basegi pakistan me

Headline 15.01.08
Kya Britni basegi pakistan me ?
Postmortem :
Kuch to reham khayo madam,
agey hi vahan kam bval hai kya ?
(Published on 16.01.08)

Bijli ke taro se

Headline 15.01.08
Bijli ke taro se milega broad band connection.
Postmortem :
Suchna ke liye bahut bahut dhanyawaad,
Log apko kasht nahi denge, khud hi le lenge.
(Published on 16.01.08)

Metro ke maze

Headline 14.01.08
80 Hazar log pahunche metro se pragti maidan.
Postmortem :
Lakh takia to jab ayegi tab ayegi,
metro ke lakho to ban gaye.
(Published on 15.01.08)

Kambakht ishq

Headline 14.01.08
Bruni se ishq lada, janmat khoya sarkoji ne.
Postmortem :
Ishq ne sarkoji apko nikama kar diya
verna admi to they aap kaam ke.

Amanat me khyanat

Headline 14.01.08
Dost ki girl friend se
rishta banane me hui hatya.
Postmortem :
Amanat me khyanat ka
yahi anjaam hota hai,
jaan jati hai so alag
naam bhi badnaam hota hai.

Sauda pat gaya

Headline 14.01.08
Anadhikrat colonio me tod fod nahi.
Postmortem :
Baley o baley, sauda pat gaya lagta hai...

Goyal saheb ki farmaish

Headline 14.01.08
Shiela v Maakan istifa de : Goyal
Postmortem :
Aap kya samajhte hai Goyal saheb
aap kahenge aur voh apna istifa ba-izat
tashtari me saja ke aapke saamne pesh kar denge ?

Knowledge city

Headline 13.01.08
Knowledge city ke roop me viksit hogi Delhi.
Postmortem :
Sahi kaha bhaiya, hatya, dakaity, lootmaar aur
balatkaar jaise courses ke topers sare Delhi me hi to hai.

Ichayon pe kabu

Headline 13.01.08
Ichayen ho to manzil mushkil nahi : Wag
Postmortem :
Aur santo ke vachan hai ki ichayon pe kabu
paoge to manzil khud b khud mil jayegi.

Khabaria chenal

Headline 13.01.08
Khabaria chenalo se gayab ho rahi rajnitik khabre.
Postmortem :
Kamaal hai, gulab jamun me gulab aur
phool gibhi me phool dikhta hai kya ?
(Published on 14.01.08)

Zarurat se zyada...

Headline 13.01.08
Bike swar ne maari sipahi ko takkar.
Postmortem :
Zarurat se zyada mooh khol diya hoga...

Sarkari farmaan

Headline 13.01.08
Chaudhary ko ghar khali karne ka adesh.
Postmortem :
Arey sarkar apko khud ka pata hai ki aap
kitne din hai apne ghar me.

Swasthye pariyojnaye

Headline 13.01.08
Swasthye pariyojnaon me croro ka ghotala.
Postmortem :
Jo swasthye pariyojnaon ko swasth man aur
swasth vichar se nahi chala sakte, unka swasth
bigar dena chahiye.
(Published on 14.01.08)

Lagey raho munna bhai

Headline 13.01.08
UP se hi nahi MP se bhi
aa rahe hai avaidh hatiyaar.
Postmortem :
Lagey raho munna bhai, abhi to
kai jagho ke naam saamne ayenge.

Galtion se sabak

Headline 13.01.08
Log meri galtion se zarur sabak lenge : Jones
Postmortem :
Yahan to log apni galtion se sabak nahi lete madam.

Musharaf ka mashwara

Headline 12.01.08
Pakistan par hamla
karne wala pachtayega : Musharaf
Postmortem :
Bilkul pachtayega hazoor kyunki
usko milna kya hai apke yahan se ?

Gazab ka aiena

Headline 12.01.08
Koiena banegi jharkhand ka aiena.
Postmortem :
Ab agar aisa aiena ho to kaun
kambakht agey se hatne chahega.
(Published on 13.01.08)

CD bator gavah

Headline 12.01.08
Police ne jaanch ke liye kabze me li CD.
Postmortem :
Ab CD hi batayegi na ki kisne kitn liya,
taki hissa maangne me asaani rahe.

Shaeyri ka andaz

Headline 12.01.08
Shaeyri se rubru karane ka anutha tarika.
Postmortem :
Pehle mohabat karo dhoka khao
aur jaam uthao, phir dekho kaise
shaeyri khud b khud andar se nikalti hai.
(Published on 13.01.08)

Viyagra ki khubian

Headline 12.01.08
Behre ho sakte hai viyagra lene wale.
Postmortem :
Arey bhai abhi tak to iski
ek hi khubi pata thi ab
dusri bhi pata lagi, bivi ki
bak-bak se bhi bach sakta hai.

khet khalihan

Headline 12.01.08
Ab videsh jakar karayenge kheti.
Postmortem :
Kyun bhai apne yahan khet khalihan
nahi rahe ya beej aur khaad khatam ho gaye ?

'Tare zameen par'

Headline 11.01.08
Adwani dekhenge 'Tare zameen par'
Postmortem :
Kab, elections ke pehle ya elections ke baad.

Ek duje ke liye

Headline 11.01.08
Sarkoji ki purv patni adalat me.
Postmortem :
Uski hone wali patni bhi adalat me,
ek chodne ke liye to dusri judne ke liye.

Kare koi bhare koi

Headline 11.01.08
Kamate dish-tata, gavaye DD.
Postmortem :
Kare koi bhare koi,
yeh nahi suna kya apne ?

Khud bhale to jug bhala

Headline 11.01.08
Team ki chavi sudharenge ponting.
Postmortem :
Khud bhale to jug bhala, ponting saheb.
(Published on 12.01.08)

Kisi ka gussa kisi par

Headline 11.01.08
Trefic police walo par giregi gaaj.
Postmortem :
Aur gussa utrega bechari janta par,
shaamat ayegi aaj.
(Published on 12.01.08)

Pidit ki peeda

Headline 11.01.08
Pidit ka vahan nahi hoga jabat.
Postmortem :
Aur agar jeb me paise na hue to ?

Sadko ka nirman

Headline 10.01.08
Sadko ke nirman karye ka udhghatan.
Postmortem :
Mubarak ho, lekin telephone aur bijli vibhag
ke log bhi peeche hi khade hai khudai ke liye...

Waqt waqt ki baat

Headline 10.01.08
Delhi sarkar ke kai adhikari idhar se udhar.
Postmortem :
Waqt waqt ki baat hai, kabhi yeh paisa idhar se
udhar karte hai aur kabhi khud idhar se udhar hote hai.

Parde me rehne do

Headline 10.01.08
Sting me trefick police be-nakab.
Postmortem :
Parde me rehne do parda ne uthao,
parda jo uth gaya to bhed khul jayega.

Gulab jamun me gulab

Headline 10.01.08
Adesh par adesh, par nahi mila dakhila.
Postmortem :
Gulab jamun me gulab dhundhte ho,
bade nadan ho....

khel bhavna ki paribhasha

Headline 09.01.08
Mene khel bhavna ke tehat kiya : Ponting
Postmortem :
Apne to khel bhavna ki
paribhasha hi badal dali ponting saheb.
(Published on 10.01.08)

Videshi takato ka haath

Headline 09.01.08
Videshi madad se hi banegi Misile.
Postmortem :
Arey kyun mauka dete ho kehne ka
ki inki takat me videshi takato ka haath hai.

10 Hazar ka kuda

Headline 09.01.08
Kuda uthane ki kotahi par 10 hazar ka jurmana.
Postmortem :
Arey bhaiya sahi se agar kuda utha lete
to kam se kam yeh 10 hazar kuda hone se bach jatey.

Sadak suraksha saptah

Headline 09.01.08
Sadak suraksha saptah par compitition.
Postmortem :
Is compitition me blue line
wale bhi bhaag le rahe kya ?
(Published on 10.01.08)

Khuda ko jawab

Headline 09.01.08
Paon kabar me, dimag kaale karobaar me.
Postmortem :
Arey bhai kal ko upar ja kar khuda ne puch liya
to kam se kam jawab to de sakti hai ki sab kaam
kiye, taki vo phir se vapis na bhej de.

Delhi ki takat

Headline 09.01.08
Bahar ke log Delhi ki takat hai.
Postmortem :
Wah kya kehne hai apke janab
kal aap kahenge ki bahar ke
mulk hindustaan ki takat hai....
Sharam karo !

Chunav ki taiyari

Headline 09.01.08
Chunav ki taiyari me jut jayen.
Postmortem :
Kitne adhey, kitne pauye aur
kitne murgo ka order de, zara yeh bhi bataye.
(Published on 10.01 08)

Peene ke baad

Headline 09.01.08
Peekar chalane ke khatre hai bade.
Postmortem :
Fikar not, peene ke baad to khatra saamne
wale ko hi zyada rehta hai.

Aap ki chusti

Headline 08.01.08
24 Ghante me bijli ka connection.
Postmortem :
Ab yeh aap ke oopar hai ki aap kitni
jaldi sauda pata sakte hai.

Nashtey ka kaam

Headline 08.01.08
... To subah nashtey me nahi milegi bread.
Postmortem :
Koi baat nahi hum alloo aur gobhi ke prantho
se hi kaam chala le lenge.

Khoon ki matra

Headline 08.01.08
Nigam schoolo ke bacho me khoon ki kami.
Postmortem :
Aur private school ke bacho me kuch
zyada hi hai, isi liye to shayad bahate rehte hai.

Kash, kintu, prantu

Headline 08.01.08
Dada bole, kash ! me aur dravid out na hote.
Postmortem :
Kash, kintu, prantu ki dunia se niklo dada
yeh shabad hi aisa hai, kash me bhi Amitabh hota.
(Published on 09.01.08)

Kehne ka jazba

Headline 08.01.08
Vyavhar kharab nahi tha,
sorry bhi nahi kahenge.
Postmortem :
Tum keh bhi nahi sakte beta,
sorry kehne ke liye bhi jazba chahiye.
(Published on 09.01.08)

Nigah kahin nishana kahin

Headline 08.01.08
Mayawati ke nishane par congress.
Postmortem :
Kahin pe nigahey, kahin pe nishana
ab tak to suna hi tha, aaj hamne bhi mana.

Apno ne mara

Headline 07.01.08
Umpires se hara Bharat.
Postmortem :
Hame to apno ne mara,
gero me kahan dum tha,
kashti hamari vahan dubi
jahan paani kam tha.

Anil ka sapna

Headline 07.01.08
Anil ka sapna : sabko mobile v bijli.
Postmortem :
Roti, kapda aur makaan
ke baarey me kya vichar hai bandhu ?

Vinash kaale vipeet budhi

Headline 07.01.08
Jald hi shaadi rachayenge Sakorzi aur Bruni
Postmortem :
Vinash kaale vipeet budhi,
yeh hamne kaksha 5 me padha tha.

Loan me mushkil

Headline 07.01.08
April se loan lena hoga mushkil.
Postmortem :
Mushkil shabad to isme rahega hi,
pehle loan lene me mushkil aur baad
me loan chukane me mushkil.
(Published on 08.01.08)

Bajat ki taiyarian

Headline 07.01.08
Bajat ki taiyarian shuru
Postmortem :
Theek vaisi hi na jaisi
bakrey ko kaatne se pehle ki jaati hai.

'Tarey zameen par'

Headline 06.01.08
Director Amir videsho me chaye.
Postmortem :
Jo shaks 'Tarey zameen par' la sakta hai
vo kahin bhi chaa sakta hai.

Punji ka laalach

Headline 06.01.08
Ab jyoti basu ko bhi bhaane laga hai punjiwaad
Postmortem :
Arey bhai yeh punji cheez hi aisi hai
iske laalach se to achey-achey nahi bach paye.
(Published on 07.01.08)

Is paar ya us paar

Headline 06.01.08
Sabhi adhunik suvidhaye hongi yamuna paar.
Postmortem :
Lekin kahan par, is paar ya us paar ?
(Published on 07.01.08)

Designer bat

Headline 06.01.08
Lo chala cricket bat bhi designer ban ne.
Postmortem :
Tab to isme se glamour hi chalkega
run to ban ne se rahe.

Kalyug ka kamaal.

Headline 06.01.08
Akshar dhaam mandir ki suraksha chust.
Postmortem :
Yeh kalyug ka kamaal hai bhaiya,
bhagwan ko bhi apni suraksha ke liye
ansaano ka sahara lena padta hai..

Mausami bukhar

Headline 05.01.08
Ishq me deewane hue saif
Postmortem :
Arey kahe ki deewangi, mausami bukhar hai
kai dafa chada, kai dafa utra, aur yeh to utarte
pata bhi nahi chalega.
(Published on 06.01.08)

Bhrum vasuli ka

Headline 05.01.08
Chauthey v paanchve floor ko lekar bhrum.
Postmortem :
Arey seedhey kaho yaar bhrum to vasuli ka hai
ki kya vasul kiya jaye.
(Published on 06.01.08)

Krida sthal

Headline 05.01.08
11 Khel parisaro ki suchi taiyar.
Postmortem :
Vidhan sabha aur lok sabha ko chod kar
baaki ke 9 kaun se hai bhai ?

Kehna kuch-karna kuch

Headline 05.01.08
Bank loan sasta hone ke assar.
Postmortem :
In par bharosa mat karna mere yaar
yeh kehte kuch hai, dikhate kuch hai
aur karte kuch hai.

Bachey disco me...

Headline 04.01.08
Tarey zameen par,
shiksha adhikari cinema hall me.
Postmortem :
Parents daftar me aur bachey disco me...

Kamai ka hisab

Headline 04.01.08
Kahin atikraman hataya to
kahin hathoda chalaya.
Postmortem :
Arey bhai itni mehnat ke baad kitna
maal kamaya, iska bhi koi hisab hai bhaya.

Rishto ka sach

Headline 04.01.08
Jis se rakhi bandhwai
usi ko lakho ki chapat lagai.
Postmortem :
Rishtey naatey pyar wafa sab
baatey hai baato ka kya.

Admi ki fitrat

Headline 04.01.08
Yatayaat police ka helpline No. badla.
Postmortem :
No. badalne se admi ki fitrat to nahi badalti hai sir.

Dosh puran gaadian

Headline 04.01.08
Dosh puran gaadian sadak se hatai jayengi.
Postmortem :
Nazrana milne ke baad to
admi ke dosh bhi nazar nahi aatey,
aap gaadion ki baat kartey ho.

Pasandida jagah.

Headline 04.01.08
Rehdi lageygi be-dhadak, par har jagah nahi.
Postmortem :
Jahan ka hafta tey karoge vahin par lageygi
ab yeh aap dekho apko kaun si jagah pasand hai.

Tare zameen par

Headline 03.01.08
Sarkari adhikari bhi dekhenge 'tare zameen par'
Postmortem :
Arey dekhne do inhe bhi to pata lagna chahiye,
inho ne janta ko bahut tare dikhaye hai.

Delhi me crime

Headline 03.01.08
Delhi me crime : marz badta gaya, jyo-jyo...
Postmortem :
Lagta hai dava ke badle daru ka istmaal
ho gaya hoga, tabhi to...

DDA ka lekha jokha

Headline 03.01.08
Is saal 358 crore kharch karega DDA.
Postmortem :
Kharch karega to kaun se teer marega,
is saal hathode chala ke aur seal kar ke
kamaya bhi to.

khel nirman ka khel

Headline 03.01.08
Khel gaon nirman me rok nahi.
Postmortem :
Rok lage bhi kaise, is khel nirman ke
khel me hi to kai khel khele jayenge.

Atank ke saye me

Headline 02.01.08
Atank ke saye me mna nav varsh.
Postmortem :
Kya yahi 8 ke thaat hai ?

Patri ka pata

Headline 02.01.08
Jald khulasa karegi STF hamle ka.
Postmortem :
Samay aur sthan ka gyan ho to patri
ka pata lagne me der nahi lagti jajmaan.

Meri Delhi meri shaan

Headline 02.01.08
Lagataar 5ve saal apradh me top par Delhi.
Postmortem :
Wah kya baat hai, O dil khush kita hi,
meri Delhi meri shaan, mera Bharat mahan.
(Published on 03.01.08)

Jaam hi jaam

Headline 02.01.08
Jaam se hua naye saal ka agaaz.
Postmortem :
Isi liye to kehta tha, peene ki adat
daali hoti to log 'Glasso' ke jaam ke sath
rehte aur sadko par jaam nahi lagta.

Peene ka lekha jokha

Headline 02.01.08
31 ko gatak gaye 12 crore ki sharab.
Postmortem :
Arey yaar us 12 crore me se 450 kam
kar lena kyun ki kharidi to mena bhi thi
lekin pee nahi.

Sarkar ka dava

Headline 02.01.08
Sarkar ne kiya dava, khub kamaya.
Postmortem :
Arey zarur kamaya hoga bhaiya,
pedal chalne walo tak ko to choda nahi apne.

AIMS ki baagdor

Headline 02.01.08
Ab policia dande se chalega AIMS.
Postmortem :
Agar AIMS ko police wale
chalayenge to yakin mano
log bimar hone se bhi katrayenge.

Khub macha ha-ha kaar

Headline 02.01.08
Khub macha ha-ha kaar,
par kam hue haadse.
Postmortem :
Shayad isi liye 740 blue line
baso ko chalne ki ijazat de di.

Malika se sabak

Speedpost : 01.01.08
Malika se sabak seekha heroins ne.
Postmortem :
Kapda udhyog apka abhari hai
malikaye husan, is baar apse sabak
seekh kar baki heroins naye saal ke jashan
me kapde pehan kar nachi.

Madona Rajasthan me

Headline 01.01.08
Naya saal manane
Madona pahunchi Rajasthan.
Postmortem :
Yeh to sarasar baimani hai bhai,
aath ke thaat to Delhi ke liye they,
phir madona rajasthan kaise pahunch gai.
(Published on 02.01.08)

Pehle murgi ya anda

Headline 01.01.08
Bihar ke chor giroh hai crorepati.
Postmortem :
Ab chor crorepati hai ya crorepati chor
yeh to ram hi jaane, pehle murgi aai ya
pehle anda aya iska hal to aaj tak nahi mila.

Sai ko sau crore

Headline 01.01.08
Sai ko sau crore ka uphar.
Postmortem :
Admi hai badha vyapari,
aisi hi nahi karta yaari,
agar sau crore dega to
farmaish karega usse bhari.

Apna-apna karam

Headline 01.01.08
Voh mustaid rahe aur hum nishchint.
Postmortem :
Voh mustaidi se rahe, hum mauj se rahe
apna-apna karam tha dono pura karte rahe.

Aath ke thaat

Headline 01.01.08
Delhi walo ko thaat karane aya aath.
Postmortem :
Aath ke thaat sirf Delhi ke liye hi kyun bhai,
baki shehro ne kya gunah kiye hai.
(Published on 02.01.08)