Mehngai ki maar

Headline 21.03.08
Mehngai ki maar beshumaar.
Postmortem :
Bas itni jaldi himmat gaye haar
abhi to bahut kuch sehna hai mere yaar.

Panch hazar ki cigrett

Headline 21.03.08
Panch hazar ki padh jayegi ek cigrett.
Postmortem :
Aur jis din padhegi uske baad ga ke dikhana
" Har fikar ko dhuen me udata chala gaya "

Cherity begins at home

Headline 21.03.08
Atankvaad se ladne ko ek ho dunia : Bharat
Postmortem :
Kehte hai " Cherity begins at home "
ek hone ka sabak pehle khud to seekh lo
dunia ko yeh path baad me padhana.

Sabse khush vyakti

Headline 21.03.08
Sabse khush vyakti ki talash.
Postmortem :
Kunwaro me se to phir mil jayega parantu
shadi shuda me se to koi chance hi nahi.

Kudrat ka karishma

Headline 20.03.08
Jume ko amar, akbar, anthony sab khush
Postmortem :
Kash insaan isi se kuch seekh leta.

Satsang mahaan karye

Headline 20.03.08
Satsang hai mahaan karye.
Postmortem :
Ek kaan se sun kar dusre se nikal doge
to kahe ka mahaan karye.

College me ched-chad

Headline 20.03.08
College se mile anko ke sath
ched chad nahi hogi.
Postmortem :
Arey college me ched-chad
aur voh bhi anko ke sath,
aur koi nahi mila kya ?

Blueline ka dukh

Headline 20.03.08
Blueline ke mukable,
truck hadso me zyada mare.
Postmortem :
Bechare bluelin wale, zarur dukhi
hue honge ki truck wale humse
agey kaise badh gaye.

Ek phool do maali

Headline 19.03.08
Court ne kaha: sanjay nahi
meraj ki patni hai manyeta.
Postmortem :
Ek phool do maali
phool ko le gaya bhanvara
reh gaye dono khali.

Pani ki bachat

Headline 19.03.08
Pani na kare barbaad.
Postmortem :
Pani bachane ka asaan tarika :
pani neet na pee kar daru mila
kar piyo, kam lagega.

Chadave ka number

Headline 19.03.08
Disha nirdesh pura karne wali
colonia hi hongi nayamit.
Postmortem :
Aur chadava chadane wali colonio
ka number ayega baad me.

Bhavna ki bhavna

Headline 19.03.08
Bhavnao ke pravah ke saamne
bekabu hota hai vyakti.
Postmortem :
Aur bhavna ke ek thappar padh jaane par
kabu bhi aa jata hai vyakti.

Bakre ki maa.....

Headline 18.03.08
Choti dukano se sealing ke baadal filhall chatey.
Postmortem :
Bakre ki maa kab tak kher manayegi
kasai ki nazro se kab tak bach payegi

Kudrat ka niyam

Headline 18.03.08
Dino din chadhe they, rato raat dhahe.
Postmortem :
Isi ka naam kudrat hai bhai
jab deti hai to chappar phar ke deti hai
aur leti hai to kapde udhar ke leti hai.

Netao ke gun

Headline 18.03.08
Vidhan sabha me dangal
vidhayeko ne kiye hath saaf.
Postmortem :
Agar bache danga karte hai to
unhe daanto mat samajh lo ki unme
neta ban ne ke sabhi gun maujud hai

Delhi ka dil

Headline 18.03.08
Banglore me tuta Delhi ka dil.
Postmortem :
Inhe Mumbai bhej do,
dil ko jodne ka sab saamaan
maujud hai vahan.

Dil ko behlane ka........

Headline 18.03.08
Mehngai par lagayenge lagam : Chidambram
Postmortem :
Dil ko behlane ka galib yeh khyal acha hai
Kaise pata lagaye ke apka ye jazba sacha hai.

kamaal of india

Headline 17.03.08
Maal of india, kamaal of india.
Postmortem :
jo dikhta hai har sadak ke har chaurahe par.....
(Published on 18.03.08)

Chunav ka hisab-kitab

Headline 17.03.08
Ek-Ek lakh rupey jutane ke nirdesh diye.
Postmortem :
Arey is se kya hoga bhaiya
pichle chunav ka kharcha niklega nahi
aur agla chunav lada nahi jayega.
(Published on 18.03.08)

Police ka dhyan

Headline 17.03.08
Chor uda le gaye samaan
shikayat par nahi police ka dhyan.
Postmortem :
Bekar ki baat mat karo srimaan
police shikayat ko dekhe ya apne hisse ko.

Holi mubarak !

Headline 17.03.08
Kalkaji police ne 37 peti sharab jabt ki.
Postmortem :
Holi mubarak ! jugar ho gaya.
(Published on 18.03.08)

Boya pedh babul ka...

Headline 17.03.08
Pak me aur atam ghati hamlo ki dhamki.
Postmortem :
Boya pedh babul ka to aam kahan se hoye.

Sukh-dukh ka kaaran

Headline 16.03.08
Sukh-dukh ka kaaran swayam manushye hi hai.
Postmortem :
Galat ! dukh ka kaaran to padosi hai
jiski gaadi meri gaadi se zyada badi hai
aur jiski kameez meri kameez se zyada safed.
(Published on 17.03.08)

Sahi marg darshan

Headline 16.03.08
Bharat vishwa ko dikha sakta hai raah.
Postmortem :
Zarur dikha sakta hai, bas ek baar
hame sahi raah mil jane do.
(Published on 17.03.08)

Bechare blueline yatri

Headline 16.03.08
Blue line bus ke yatrio ko peeta.
Postmortem :
Bechare yatri, sadak par kuchle jane ka dar
aur andar pitne ka, wah re blueline walo.

Khali hoti thali.

Headline 16.03.08
Khali hoti thali.
Postmortem :
Jis thali me khate ho usi me
ched karte ho to aisa hi hoga na.

Diljalo ko muavzaa

Headline 15.03.08
Dil jalne par muavzaa.
Postmortem :
Savdhan Americi embessy walo
aaj visa ke liye line lagegi, kyun ki
yahan pe diljalo ki kami nahi hai.

Faislo se avsar

Headline 15.03.08
Faisle se vaidh makaano ke nirman
ke avsar milenge.
Postmortem :
Shukria sir, apke is faisle se kai logo
ko kai tarah ke avsar milenge,
mehkame ke andar bhi aur bahar bhi.
(Published on 16.03.08)

Unmukt filmo ke liye

Headline 15.03.08
Unmukt filmo ke liye alag hall ki pehal
Postmortem :
Kyun kharcha karte ho bhai, yeh kaam
to channel wale bakhubi nibha rahe hai.
(Published on 16.03.08)

Memory tonic bazar

Headline 15.03.08
Parikshao se badha memory tonic bazar.
Postmortem :
Memory tonic to me bhi leta hu lekin
kuch yaad nahi aa raha kya leta hu ?

Bush ki mansha

Headline 15.03.08
Jwan hota to afganistan jata : Bush
Postmortem :
Jawan nahi they to Monika ka kissa
bana diya aur agar jwan hote to kya
gul khilate.

Sankat me janta

Headline 14.03.08
Satta ke galiyare me bhi peyjal sankat.
Postmortem :
Inka kya hai yeh to daru se kaam chalalenge
janta ki socho bhai.

Jeewan ki dor

Headline 14.03.08
Nikla tha kuch keh ke pahunch gaya kahin aur.
Postmortem :
Jeewan ki dor badi kamzor,
socho kuch hota kuch aur.

Inamo ki bauchar

Headline 14.03.08
Inamo ki lagi bauchar.
Postmortem :
Hamara dhyan bhi rakho sarkar
hum bhi khade apke dwar.

BJP ne uthaya swal

Headline 14.03.08
Sonia-Rahul ke likhit bhashan par
BJP ne uthaya swal
Postmortem :
Arey bhai likh ke padhne me kya hai burai
jo BJP bematlab hi chilai.

Bharat ki dosti

Headline 14.03.08
Bangla desh ne bhi mana
Bharat se dosti me hi hai samajhdari.
Postmortem :
Bharat ki dosti ko to dunia ne pehchana
kaun sa teer mara jo bangla desh ne mana.
(Published on 15.03.08)

Sarkari mehkame

Headline 13.03.08
Bharat me vikas ki prabal sambhavnaye.
Postmortem :
Lagta hai sarkari mehkamo se pala
nahi padha inka.
(Published on 14.03.08)

Notice ka mantra

Headline 13.03.08
Garib bacho ko dakhila na dena par
53 schoolo ko notice.
Postmortem :
Notice bhejne walo ke bacho ko
dakhila dedo, notice wapis.
(Published on 14.03.08)

Teen minute ka kissa

Headline 13.03.08
Teen minute se zyada bole to mike band.
Postmortem :
Arey bhai teen minute to yeh gala saaf
karne me hi laga dete hai, to bolenge kya ?

lahore ka safar

Headline 13.03.08
Mehnga hua lahore ka safar.
Postmortem :
Kitna mehnga padha lahor ka safar
yeh to koi "Kashmir" ke dil se puche.

Charcha ka vishye

Headline 13.03.08
Aam bajat par charcha shuru.
Postmortem :
Chalo koi to mudda mila time pass karne ko
verna kaam to inke pass koi hota nahi karne ko.
(Published on 14.03.08)

Rutho ko manalenge

Headline 13.03.08
BJP ke digaj vipaksh ko manane pahunche.
Postmortem :
Arey ruthna manana chodo aur zara
kaam ki taraf bhi dhyan laga lo
chunav sar pe hai.

Chunav ki taiyari

Headline 12.03.08
Chunav ke liya taiyar rahe : Sonia
Postmortem :
Pehle ruthoko to mana lo madam...

Ghar ki murgi daal barabar

Headline 12.03.08
Desh me mauke bharpur, to kyun jaye dur
Postmortem :
Ghar ki murgi daal barabar hoti hai,
suna nahi kya apne ?
(Published on 13.03.08)

Digital yug

Headline 12.03.08
Vegyaniko ne taiyar kiya digital bacha.
Postmortem :
Aur iske baad number ayega
digital bivi ka ?
(Published on 13.03.08)

Sarkar ki chinta

Headline 12.03.08
Dobara sealing par sarkar chintit.
Postmortem :
Chinta to hogi hi,
karam jo aise kiye hai aur
chunav sar pe hai.

Hum nahi sudhrenge

Headline 12.03.08
Peyjal apurti me sudhar nahi.
Postmortem :
Jis din voh sudhar jayenge,
hum ganga naha aaye
yeh hum samajh jayenge.

Kaun karega kuligiri

Headline 11.03.08
Kaun karega kuligiri ?
Postmortem :
Shaadi shuda becharo se to puchna mat,
aur bakio ka pata nahi.
(Published on 12.03.08)

Ye kahan aa gaye hum

Headline 11.03.08
Ye kahan aa gaye hum.
Postmortem :
Yeh mat socho kahan aa gaye hum
yeh socho kahan jaa rahe hai hum.

Rashtriye khel ki durgati

Headline 11.03.08
Rashtriye khel ki durgati ka naya record
Postmortem :
Khiladio ko khelne do, khud khelna chod do
fir dekho khel ka rang.....

Roz-roz ki khabar

Headline 11.03.08
Jalapurti prabhavit rahegi.
Postmortem :
Roz-roz ek hi khabar chapne se to acha hai
ek baar chaap kar neeche likh do
' Saal bhar ke liye manye hai '
(Published on 12.03.08)

Pani pee pee ke kosa

Headline 11.03.08
Sushma ne laloo ke bajat ko
pani pee pee ke kosa.
Postmortem :
Kosna to ham bhi chahte they magar
kya kare kambakth ain mauke pe
pani ne dhoka de diya.

Patli gali ka udhghatan

Headline 10.03.08
Gali nirmaan karye ka udhghatan.
Postmortem :
Pehle gali ka udhghatan karte hai
fir usi patli gali se bhagte nazar aatey hai.

North grid fir fail.

Headline 10.03.08
North grid fir fail.
Postmortem :
To south, east, west kaun se pass hai...

Naye ashwasan

Headline 10.03.08
Rinn maaf karne ki dharna nai nahi : Chidambram
Postmortem :
Ashwasan to naye nahi hai,
lekin agar amal me ho jaye to
shayad koi naya pan aa jaye.

Umar ka khyal

Headline 10.03.08
Umar ka rakho khyal :
Postmortem :
Khyal to bahut tha par kya kare
kambakth 'chini kam aur nishabd'
ne sab bhula diya.
(Published on 11.03.08)

Dhoni ka nayapan

Headline 10.03.08
Nai naveli bike se fur ho gaye Dhoni
Postmortem :
Arey bhai yeh bhi koi khabar hai
khabar to tab hoti jab
nai naveli dulhan ko
nai naveli bike par kisi nai jagah le jate.

Waqt ka khel...

Waqt aur Halaat...
Socha na tha zindagi me ik aisa waqt bhi ayega,
tanha honge ham aur sab kuch bikhar jayega
ehsas hi na hua hame yeh kya se kya ho gaya
jab tak ham aye hosh me tab tak sab kho gaya
sunsaan raho me ham is kadar bhatak gaye
jana tha kahan aur na jane kahan pahunch gaye.
...................................................................
Khel -Khel me...
Log dilo se khelte hai ham dil walo se khelte hai
log chupan chupai khelte hai ham khulam khula khelte hai
log auro se khelte hai ham khud se khelte hai
log bhavnao se khelte hai ham kaamnao se khelte hai
log bato-bato me khelte hai ham mis cal sede ke khelte hai
is khel hi khel me na jane kya khel khel gaye
aise bichde ham zindagi me ke be-mel ho gaye
bas ab na koi khel hoga na khelne wale honge
na koi mel hoga na milne wale honge
hongi to bas meri tanhaiya aur teri yaade
kasam se bahut yaad ayenge vo tere na pure hue vaade.

Zindagi-Zindagi...

Zindagi-Zindagi...
Zindagi tujhe itna karib se dekh liya
tera diya har dukh, har gam hamne jhel liya
tu bhi kya yaad karegi, kis insaan se pala padha
tere har gam se hamne khel samajh ke khel liya.
...................................................................
Mukaddar ka sikandar...
Mukaddar ke sikandar hai voh
jinho ne taqdeer ko badal diya
ham to voh haalat ke marey hai
jinko taqdeer ne badal diya
nikle they ham to ghar se dunia badalne ko
kudrat na hame aisa patka,
kabil na choda chalne ko.

" Zindagi isi ka naam hai "

" Zindagi isi ka naam hai "
Aj tanha hai to kya hua, kal mehfil bhi hogi
zindagi isi ka naam hai, yeh baat samajhni hogi
apno ne dutkara, gero ne fatkara
gar zar jo hota pass to yeh haal na hota hamara.
....................................................................
Aj tanha hai to kya hua, kal mehfil bhi hogi
zindagi isi ka naam hai, yeh baat samajhni hogi
kabhi acha to kabhi bura hai, yahi kudrat ki rachna hai
sukh dukh to khuda ke khel hai, inke bina to zindagi bemel hai
gamo se ghabrana mat, dukho se darna mat
yeh to bas imtihan hai, koi pass hai to koi fail hai
jo pass hai vo sada pass nahi rehte
jo fail hai vo sada fail nahi rehte
badlav to jeewan ka dastur hai,
yeh mat samajhna ke tu majboor hai.

"Jeewan ki dor "

"Jeewan ki dor "
Jeewan ki dor, badhi kamzor
socha tha kuch, ho gaya kuch aur
wah re upar wale, kya-kya rang dikha daale
is bheed bhari duniya me, rishto ke padh gaye laaley
kehne ko hai sab, magar ey rab
tune to apni kismat par hi jad diye taaley
kis se kare shikayat, kis se kare umeed
sab pala jhaar gaye, jo they apne kareeb
kahan hai vo rishtey, kahan hai vo naatey
bas reh gai khokhali baatey
wah ri teri maya, kya khoob sabak sikhaya.

" Budape ka dard "

" Budape ka dard "
Samajhte they jinhe hum lathi, vo to lath nikle
padhe jab unke war, to socha kab dum nikle
ungli pakad ke jinhe, hamne chalna sikhaya
khud geele pe magar, unhe sukhe pe sulaya
achi buri raho se, unka parichey karaya
par unho ne pal bhar me hame, bahar ka rasta dikhaya
tute tinko ki tarah ham bikhar gaye
dil ke armaa sab dil me hi dharey gaye
sunsaan raho par akele chale jaa rahe they
halaat ke maarey ham, waqt ke thapere kha rahe they
achanak tabhi khyal aya, bazurgo ka kaha kuch yaad aya
"Daddy daddy kaha to sada sukh paya
daddy daddy kehlaya to sada dukh paya.
(Published in Punjab Kesri on 06.02.08)

Mehngai ki maar.

Headline 09.03.08
Bechain kar rahi hai mehngai.
Postmortem :
Arey iske agey kya chachi kya tai
fir teri meri kya bisat mere bhai.

Rahul ko seekh

Headline 09.03.08
Yuvao ko mauka nahi de rahe dal.
Postmortem :
Mauke milte nahi liye jate hai,
kinare beth kar machli ka intzaar
mat karo, chalang laga kar machli
pakadna seekho Rahul baba.

Der aaye durust aaye

Headline 09.03.08
Kashmir singh ko riha kar ke
galat nahi kiya : Bruni
Postmortem :
35 Saalo ke baad manavta ki yaad aai ?
Bahut der kar di meherba aate aate.

Mera Bharat mahan....

Headline 09.03.08
Bazurg samet 6 logo ne khudkashi ki.
Postmortem :
Jinhe naaz hai hind par vo kahan hai....
Meri Delhi meri shaan....
Mera Bharat mahan....
(Published on 10.03.08)

Marta kya na karta

Headline 09.03.08
Musibate hazar, fir bhi jari hai vyapar.
Postmortem :
Marta kya na karta, aur koi
chara bhi to nahi mere yaar.
(Published on 10.03.08)

Sarkari lolly pop

Headline 08.03.08
Kendriye karmio ke mehngai bhato me vradhi.
Postmortem :
Akhir sarkar ne chunavo se pehle
de hi diya mooh me lolly pop.
(Published on 09.03.08)

Janam sidh adhikar

Headline 08.03.08
Delhi police me aur badha bhrashtachaar.
Postmortem :
Kyun baat karte ho bekar
kehte ho jise bhrashtachar
vo to hai inka janam sidh adhikar.
(Published on 09.03.08)

Police ki saude baazi

Headline 08.03.08
Challan kaatne par police karmi se bhide.
Postmortem :
Jo mamla pehle 50 me pat jata tha
usi ke 200 mangege to yahi hoga na.
(Published on 09.03.08)

Mehngai ki maar.

Headline 08.03.08
Dream bajat ki hava na nikal de mehngai.
Postmortem :
Mehngai ke agey kya chachi kya tai
fir is bajat ki kya bisat mere bhai.

Rally ka jayeza

Headline 08.03.08
Congress rally ki taiyari ka jayeza.
Postmortem :
Achey se dekhna zara,
adhey, pauye, sode aur murge
sab pahunch gaye na.
(Published on 09.03.08)

Lalach ka fal

Headline 07.03.08
Croro ke ghaple me
5 bank adhikario par arop tey.
Postmortem :
Aur lalach karo, kaha tha na ki
sabke hisse sahi samay par pahunch do
ab lo maze...........

Atam manthan

Headline 07.03.08
Khud ko jab jana to alag kiya thikana.
Postmortem :
Jab alag kiya thikana 'tabhi' khud ko jana.

11 Jodo ka sath

Headline 07.03.08
11 Jodo ne ek sath liye saat fere.
Postmortem :
Arey bhai pehli dafa jo le rahe they
shayad isi liye ghabra rahe they.

Ramdev ki rajniti.

Headline 07.03.08
Raj par chale desh droh ka mukadma : Ramdev
Postmortem :
Yog ki lau sansar me jalane wale
chale ab rajniti me kismat azmane.
(Published on 08.03.08)

Sesiliya ki soch

Headline 07.03.08
Ab sesiliya rachayegi dusri shadi.
Postmortem :
Bhala sarkoji ki kameez meri
kameez se safed kaise ?

Haryana vikas ke 3 varsh

Headline 06.03.08
Haryana vikas ke teen varsh.
Postmortem :
Din me teen ghante bijli dete ho
fir vikas ka raag alapte ho
arey vikas ki paribhasha jano
samridhi ko pehchano
deke janta ko uska haq
kuch to puney kamalo.

Chinta chita saman

Headline 06.03.08
Sabko hai siyasi zameen ki chinta.
Postmortem :
Aur chinta chita saman hoti hai vats...

Keemato me katauti

Headline 06.03.08
Udhyog jagat keemato ko kabu me rakhe.
Postmortem :
Zarur rakh lenge sir,
aap sirf sarkari mehkamo
se kaho vo hissa mangna chod de.
(Published on 07.03.08)

Ghar ya makan

Headline 06.03.08
Cement par badhi duty, ghar mehnge honge.
Postmortem :
Arey bhai saheb makan mehnge ho sakte hai
ghar to har keemat par sasta hi hota hai.
(Published on 07.03.08)

Bhadey ke log

Headline 06.03.08
Swagat ke liye laye gaye they
bhadey ke log.
Postmortem :
Koi baat nahi, paise bekar mat karna
inhe agli rally ke liya rakh lena
(Published on 07.03.08)

Calender ki mahima

Headline 06.03.08
Ghandi wala callender fada.
Postmortem :
Kyu bhai koi kingfisher ka
calender mil gaya tha kya.

Lutere-andar bahar ke

Headline 05.03.08
Banko ke bahar lutero ka kehar.
Postmortem :
Aur jo andar bethe befizul ke charges lagate
hai, vo kis catagory me ate hai.

Udhghatan samaroh

Headline 05.03.08
Udhghatan par shad v vidhayak me bhidnant.
Postmortem :
Aap to udhghatan par hi ghabra gaye.
Karyekram hona to abhi baki hai.
(Published on .06.03.08)

Pani ke rang hazar

Headline 05.03.08
Nadi se nahi nehar se milega pani.
Postmortem :
Pani nadi ka ho ya nehar ka,
jaam me jane ke baad to kehar hi dhayega.

Rod aur revolver

Headline 05.03.08
Rod maar kar 5000 rupay lute.
Postmortem :
Rod istmal karoge to yahi paoge
revolver liya hota to scene kuch aur hi hota.

Police rehti nadarad

Headline 05.03.08
Police rehti hai nadarad.
Postmortem :
To kya hua, hisse ke waqt to pahunch
jati hai.

Mantri ka chaal chalan

Headline 04.03.08
Mantri ki pistol chal gai.
Postmortem :
Wah kya taraki hai, ab tak to jute
chappal hi chalte they aur ab.......

Vidhan sabha ka kanoon

Headline 04.03.08
Mic fankne ke mamle me parshad nilambit.
Postmortem :
Agar ise kanoon bano do tab to vidhan sabha
khali samjho.

Mehngai ka asar

Headline 04.03.08
Mehngai sarkar ki sabse badi vifalta : Adwani
Postmortem :
Arey hazoor 80 rupay kilo pyaz bhi
apke raaj me hi bika tha na ?
(Published on 05.03.08)

Apni-apni chahat

Headline 04.03.08
Me to chahti hu mera beta kabhi out hi na ho.
Postmortem :
Me bhi chahta hu, har world cup
hamare yahan hi aaye

Roz-roz ka swad

Headline 04.03.08
Delhi ne chakha haar ka swad
Postmortem :
Ab roz-roz to biryani nahi milti na...
(Published on 05.03.08)

Dunia ka dastur

Headline 04.03.08
Apne hi ghar me americi dadagiri fail.
Postmortem :
Dunia ka dastur bhi yahi hai
baap aksar apne hi bacho ke agey harta hsi.

Nashta kijiye, rahiye swasth

Headline 04.03.08
Nashta kijiye, rahiye swasth.
Postmortem :
Lekin nashte me banai sehat ko
lunch ya dinner me mat kharab kar lena

Sharab ka asar

Headline 04.03.08
Sharab se bhara truck palta : 3 ghayal
Postmortem :
Socho zara sadak par palta to 3 ghayal
yahi agar logo ke pet me palat jata to kya hota ?

Surat aur seerat

Headline 03.03.08
Purani Delhi me dikhegi nai chamak.
Postmortem :
Make-up se surat to badal doge
par seerat ka kya karoge ?

Station samwarenge.

Headline 03.03.08
Station samwarenge.
Postmortem :
Pehle gaadian to samwaar lo...

Sharab aur sharabi

Headline 03.03.08
Sharab ke dhandebazo se mahol bigra.
Postmortem :
Aur sharabio se ghar.......
(Published on 04.03.08)

Kuch to log kahenge

Headline 02.03.08
Dream bajat par uthi kai ungalian.
Postmortem :
Kuch to log kahenge,
logo ka kaam hai kehna...
(Publihed on 03.03.08)

Tadka-fadka-kadka

Headline 02.03.08
Par rasoi me nahi laga koi tadka.
Postmortem :
Tadka jise dekh ke man fadka,
aur akhir me yeh kar de kadka.

Insani fitrat

Headline 02.03.08
Manvanchit fal nahi mil paya.
Postmortem :
Yeh to insani fitrat hai,
ise jo bhi mil jaye santosh nahi hota.

Vishva ka marg darshan

Headline 02.03.08
Bharat fir vishva ka marg darshan karega
Postmortem :
Marg darshan to hum acha kar lete hai
khud bhale hum marg se bhatke ho.
(Published on 03.03.08)
Auro ko nasihat, khud miya fasihat.

Angoor khatey hai

Headline 02.03.08
Kashmir muddey se
kinara karne ko taiyar zardari.
Postmortem :
Bachpan me ek kahani suni thi,
'angoor khatey hai', bas vo yaad aa gai.

Car ka kissa

Headline 01.03.08
Vit mantri bole lagao
dopahiye se car me chalang.
Postmortem :
Zarur lagayenge, par us din
jis din car pani se chalegi
ya petrol sasta hoga.
(Published on 02.03.08)

Delhi ki Ash.

Headline 01.02.08
Delhi ke ashwarye me lagey char chand.
Postmortem :
Keh do mumbai se zyada bhav khaye na
apne pass bhi ashwarey hai, vo itna itraye na.

Bajat ki mithas

Headline 01.03.08
Lo aya bajat jhakas.
Postmortem :
Puri ho gai aas, jiwan me bhar lo mithas.

Mehngai ka tandav

Headline 01.03.08
Hey mehngai, ab to kabu me aa jaogi na mai.
Postmortem :
Yeh na pehle kabu me aai aur na ab ayegi
yeh to apko tandav karayegi.
(Published on 02.03.08)

Naseeb apna-apna

Headline 01.03.08
Pathko ka jaap : kuch ko prasad,
kisi ko shraap.
Postmortem :
Uska karam to aam tha duniya ke vaste
kaun kitna le saka yeh mukadar ki baat hai.
(Published on 02.03.08)

Haryana ka vikas

Headline 01.03.08
Haryana vikas aur simradhi ke 3 varsh.
Postmortem :
Din me 3 ghante bijli dete ho,
fir vikas ka raag alapte ho,
khud ko mantri kehte ho,
aur janta ko behkate ho,
arey vikas ki paribhasha jano,
simradhi ko pehchano,
deke janta ko uska haq,
kuch to puney kamalo.